Leef Beumerwalders,

De lètste moanden sjteit de ganse welt op de kop. Ut Corona virus haet alles wat begin dit jaor nog gans normaal leek verangerd. Ein bezeuk aan de winkel, de sjlechter of de bekker, ein wedstrijd kieke van dien favoriete club of ein concert biewoone van ein van de sjoan muziekverenigingen die os Beumerwald riek is.
Mer auch ein gezellig samenzeen mit anger Beumerwalders. Alles is angesj. De lètste tied hub veer dèks aan alle Beumerwalders gedach en gehoopt dat ut allemoal good mit euch geit.

Mer ut geit auch weer op de 11e van de 11e aan. Eine datum woa-op veer es carnavalsvereiniging normaal op fiëstelijke wieze ut carnavalsseizoen oapene. Mer auch dat weurt angesj dit joar. Carnaval kinse, sjuus wie Kaesjmis of Poasje, neet aaflasse, mèr ut zal dit sezoen waal op ein ganse anger maneer gevierd waere.
Door de gemeinte Beekdaelen en de Veiligheidsregio Zuid-Limburg zint op dit moment sjtreng moatreigelen opgesjtèld rondom carnavalsactiviteiten. Es carnavalsvereiniging zullen veer dees moatreigelen auch noalaeve, want de gezondheid van oos Beumerwalders is veur os ut allerbelangriekste.
Dit beteikent dat veer dit joar gein groate evenementen zullen organiseren. Auch zul veer dit joar gein nuuj Prinsenparen oetroope. Prins Roel 1e, Prinses Anniek, Jeugdprins Sylvain 1e en Jeugdprinses Fenne zullen nog ein joar hunne scepter loate zjweije euver ut Beumerwald.

Ut is lestig te veursjpelle wie de situasie in januari of februari is. Op ut moment dat de moatreigele versoepelen, zullen veer edere kiër opnuuj bekieke wat meugelik is. Veer houwe euch doa-euver op de heugte via oos website en facebook.

Op ut sezoen 2021-2022 hoove veer gelökkig neet lang te wachten, want vanaaf 2021 zullen veer de nuuj Prinsenparen in november goan oetroope. Noteer alvas in de agenda:
Zaterdag 13 november 2021, Jeugdprinsenproclamasie
Zaterdag 20 november 2021, Prinsenproclamasie

Op dit moment wunsje veer euch ein goej gezondheid toe en hopelik tot gauw!

CV de Beumerwalders